Acts 2
Uleenu Tavuna Mulu'e
1 aNo anu voxo e ilemolu lexe Pentikosi ▼ muxali, la ane'i muka-lusi ne mipita no tani vile. 2Xe alaxu vilesisi 'o, la milomusou mii vile luluxu loxo atume toxoxa'a molu no opo loxotolo mulu'e mu'ana'ana no tani e ane'i mixolu no anu ne. 3 cXe mimalei loxo 'o, la mimaisou mii vile loxo navu lamixu loxo itema levexu mulapau mulu'e muxolu no kisi'a momoxa'a ta mitema ne mukalusi. 4La ane'i mi'ana'ana no anu Uleenu Tavuna mole ta mitema mukalusi ne misoko sou mivikala no anu vaivaikala iouiou. Xo Uleenu Tavuana muxolu noxi'a, la sou ane'i mimomomo sou mi'oxo aloxo ne.5Ioxe, no voxo ane ne la ta Iutaia e ilavusou itaxaanu Lataua me'a no tuatuala mukalusi no lia 'o ne, mine'e mipita ne Ielusalemu. 6Xe ane'i milomusou mii e luluxu ne, la ta mitema tavu'alo mukalusi mine'e mipita. Xo milomusou vaivaikalai'a vilevilesi noxi'a no mine ta mitema ne milelemolu no anaxa'a mu'isalili, la ane'i tane'i lili manina. 7Ane'i mikuluke manina, la sou mivikalane'i ngatongato'o lexe, “Ane'i ta mitema ane ane'i ivivikala 'o ne, ane'i sie Xalilaia mukalusi. 8Ia loxovaa, la sou nenge ta mitema ukalusi 'o telomusou vaivaikalamenge mu'isalili ane'i ilelemolu 'o? 9Nenge ta Palutoi mo ta Medoi mo ta Elamitai mo ne Mesopotamia mo ne Iutaia mo ne Kapadokia mo ne Pontasi mo ne Asia 10mo ne Pulixia mo ne Pamfulia mo ne Aixiputo mo no xalee lia se'i no nano ne Livia e muxolu 'alai ne Kilene mo ane'i ane mixixaoxao me'a ne Romu, 11ia mose'i ane'i ane ta Iutaia xe mose'i ane'i ta mitema e imulimulinu lalotu noxi'a ta Iutaia, mo nenge ta Kureta ilo'a ta Alavia telomusi'a ane'i mia'aloxu xaixai toxoxa'a noxou Lataua no anu vaivaikalamenge mu'isalili.” 12Ane'i milomusi'a aloxo ne, la mose'i mikuluke mo tane'i lili no anu, la sou ane'i mivikalane'i ngatongato'o lexe, “Mii ane muxali vaimomo 'o, anu mii ma'ia manina?”
13Xe mose'i miavuti, la mimolo-vila'isi'a la mivikala aloxo 'o, “Ane'i miiexu uaini tapiena musuku, la sou mixovulaulau aloxo ne.”
Pita Mua'alo
14Ane'i mivikala aloxo ne, la sou Pita ilo'a ane'i mavulovexa mo mulu'e no lia vile mitulu sou anu muvikala toxoxa'a mulai noxi'a ta mitema tavu'alo ne aloxo 'o, “Ngingi ta menexilo ta Iutaia mo ngingi ta mitema tavu'alo ane ngexolu no nano ne Ielusalemu 'o, ngingi ngamulaxu sangalinge laixe mo ngalomusou mii e eni alemolu noxinge 'o. 15Ngingi ngevikala lexe ane'i ta mitema 'o miiexu lexa uaini tapiena musuku, la sou mixovulaulau 'o? Uasi manina. Anu a uao aso iou ta'uve mo muxatele tami'a no kakau 'osi! 16Ia eni avikalangengi lexe mii ane muxali 'o ne, anu mii e itema sou palomatana ualasou lexe Ioeli mulemolu tatei, a muxali 'o. 17 dAnu muvikala aloxo 'o,‘Lataua muvikala aloxo 'o, no anu voxo kalukaluxusou,
la Eni anixiu Uleenu ulu'e noxi'a
ta mitema ukalusi mo ta 'ili'ili'a ukalusi sou ipalomatana.
Mo ta maulusi'a imaisou no ie'i tei mii loxo aipiepiena ane
Lataua u'oxonu ili'i xe ta aululusi'a imaisou mii ane ne no anu aipiepiena.
18Mo no voxo ane ne, la Eni unixi'u Uleenu ulu'e noxi'a
ta mulu xe ta sema sou xaixai noxilo sou ipalomatana.
19Xe Eni amaxa'u mii sou ta mitema imaisou
la tane'i lili no anu teitexi no opo loxotolo xe sosovo iouiou no anu lia 'o
loxo sialuxa'a ta mitema unixi no anu 'oto'oto mo navu
xe umuumu utomu tuatuala ukalusi.
20Xe aso ne, uxali isivoxo mo so'io ne uxali lauoinu loxo sialu tei io,
ka sou voxo tatila noxou Tila e lamanaxu ane tu'utu'umaxu musuku
mo ta mitema imama'u no anu ne, uxali.
21Ia 'ei ane ukilaka no anu Tila ualasou, la Lataua upamaulinu.’
22Ngingi ta mitema sie Isilaeli, ngalomusou vaikala ane eni elemolu 'o. Lataua mupelemasaxanu Iesu sie Naseleti ne sou mu'oxonu xaixai tatila ane ngemaisou la tangengililiiou mo sosovo iouiou no nixi noxinge aloxo ne la sou ngingi ngelavusou lexe Lataua molu mu'oxonu mii ane ne noxou Iesu. 23Lataua mu'italonu itema ane ne no avonge, la ngingi ngongi'a ta mitema ta masua ngelilixu mo ngevau musoli no ovu valautu. Mii ane muxali noxou ne, Lataua mumulinu xavutala noxou ane Anu molu muxavutala sou lexe u'oxonu mo mulavusou tei. 24Ia Lataua mutulusou no anu soli mo muxexeenu navunavu sou soli noxou, xo anu ne soli umomomo sou utetelisou uasi. 25 eAloxo ne, la sou Deviti muvikalasou aloxo 'o,
‘Eni ▼ amaisou Tila uxolu 'alai utotomu noxilo.
Xo Anu muxolu no avolo tema,
la sou mii vile u'oxoleli a'ume mo a'olo'olo uasi.
26Aloxo ne, la sou opoleli laixe mo a'osa ulai noxou Tila.
Xe eni axolu la aloopala no anu mii ane laixe.
27xo nini namomomo sou ieni uvaxa'ilosi
sou alai no lulusi'a ta mitema ane misoisoli uasi
mo nini umomomo sou ieni uvaxa'u itema ane nini nesosovosou
lexe nini na'anini ne u'ui no lulu uasi.
28Ia nini nelosielixu vote'i sou mauli
mo nini na'ana'ananixilo no anu 'osa no ieni.’
29 gTa vivilo, eni emomomo sou avikalangengi maninasou lexe 'ilusununenge Deviti ne musoli mo mi'asixu, ia lousou ne muxolu tatei mo, mo mune'e muxali vaimomo 'o. 30 hIa Deviti ne, itema sou palomatana, la sou anu mulavusou lexe Lataua musakiinu vaikala noxou lexe manina teitexi sou usosovosou 'ilusunu vile uno'u tanixu mo uxali tatananu tuala. 31 iXe mumaisou mii ane sou uxali ili'i, la anu mutotokalasou soli mo tulu noxou Kalisito lexe Lataua umalanixu ulai no lulusi'a ta mitema ane misoisoli uasi mo umalanixu vasimolu uai u'ui no lulu uasi. 32Lataua mutulusou Iesu ne mo mumauli, la sou nexi latala mukalusi temaisou mii ane ne muxali manina. 33 jAnu mutulu, la mutelai teitexi mo muxolu noxou Lataua no avolu tema. La Momu mulosou Uleenu Tavuna ane Anu musakii vaikalasou lexe ulosou. Mulosou mukalu, la sou anu Iesu munixiu mulu'e noxixe la sou ane vaimomo 'o ngingi ngemaisou mo ngelomusou ne. 34 kDeviti ne utelai no opo loxotolo uasi, ia anu muvikalasi lexe, ‘Tila muvikalanu Tila noxilo aloxo 'o.
35Navaisa'ileli no avolo tema ulai utalo no anu voxo ane
sou eni amulaxa'a ta uluameni no tava'ine laaxu.’
36 lAnu aloxo ne, la sou laixe lexe nenge ta Isilaeli ukalusi ne talavusou manina lexe Iesu e Lataua musosovosou lexe Anu Tila mo Kalisito ane, Anu ane ngingi ngelilixu no anu ovu valautu.”
37Pita mua'alo aloxo ne mukalu xe ta mitema milomusou, la tane'i ialuxu manina. La sou ane'i mitali'isou Pita ilo'a ta aposeli mose'i ne aloxo 'o, “Ta vivixe, nexi ta'oxonu mii ma'ia?”
38Xe Pita muavuti la mukolinu tali'i noxi'a ne aloxo 'o, “Ngingi vilevilesi ngaxiu opongengi mo nga'ulo no anu ualasou Iesu Kalisito, mo sou Lataua ululusou susu noxinge, la ulosinge Uleenu Tavuna. 39 mMii ane ne, Lataua musakiinu vaikalasou lexe ulosinge ngongi'a ta 'ili'ilinge mo ta mitema ukalusi ane'i ane ixolu va'axu. Xo Tila Lataua noxinge u'avali'a ine'e noxou.”
40Pita mupeletotosi'a pekia'u no anu vaikala piena mose'i la aloxo 'o, “Nga'umengengi noxi'a ta mitema ane 'ilixone'i masumasua manina vaimomo 'o.” 41 nNo voxo ane ne, la ane'i ane mino'u vaikala noxou la sou mi'ulo ne, itiitisi'a muxali loxo itemaxu mavulovexa mavulovexa mo itemaxu mavulovexa ta'uve (3,000) mutelo no anu ititisi'a ane'i ane mimulinu Iesu tei.
Ta Mitema Mixolu Opone'i Vilesisi
42 oIoxe, ane'i mixolu la ane'i xavine'i sou milomusou vaivaikala noxi'a ta aposeli noxou Iesu mo ipitapita utotomu sou ise'inu veleti sou i'ou xe ikikilaka ulai noxou Lataua. 43La ane'i tapiena vilevilesi ne, mimama'u xo imaxa'a lexe ane'i noxou Iesu ta aposeli noxou Iesu mi'oxonu mii ane ta mitema imaisou la tane'i liliiou mo sosovo iouiou. 44 pXe ane'i latala ane imuxamuxaxu tane'i noxou Iesu ne opone'i vilesisi la iveluvelu mimii noxi'a ngatongato'o. 45Mose'i noxi'a mi'italonu lialiaxa'a mo mi'ami'a sou ta mitema ilotonu xe ino'u lamolisou, la ilosi'a ta mitema ane'i ane i'a mimii uasi. 46No voxovoxo utotomu ne, ane'i i'osa'osa sou ipitapita no nano no taasou lalotu tatila noxou Lataua, mo ise'ise'i veleti no taataasi'a vilevilesi mo i'ani ipita no anu opo manina. 47 qMo i'itinu Lataua ualasou mo ta mitema ukalusi opone'i u'osasi'a kalumo. Xe Tila musukunu itiitisi'a ane'i ane Lataua upamauline'i utetelo no voxovoxo.
Copyright information for
ATA